دك باب الوطن لاتطفر الحيطان

دك باب الوطن لاتطفر الحيطان
وانه اعله الوطن ناطور خليتك
بيتك من تطفره يكوم ياهو الجان
يطفر حايطك ويهينك ابيتك
واخذ اعيون فقره وقيس وضع الناس
لتقيس الوضع بعيون حاشيتك
واسمع ياعراقي الوطن وكفه يريد
واذا ضاع العراق اتضيع تاليتك
يامهرت كرامه البغضت المصراع
ولا لاحت اسراب الكاع ناصيتك
ياقران طه الخلده الرحمن
وايات الاله البيك منجيتك
وياعيسى المسيح بكل صفات البيك
وانجيله الكرامه البيك منطيتك
هاجر بيك صلت وانته اول بيت
وساره بحب نبي ابراهيم بانيتك
ينهبونك واردك بالتفك والسيف
ومن باب اجنبي مارحت جديتك
لحظان الاجانب زفوا البلدان
واني الكلك الثروات زفيتك
اكل لحم بطني وماشكيت الجوع
ولادنكت راسي ويوم ذليتك
انام اباب بيتك للصبح جوعان
ولاتطلب خبز من جاري وديتك
كمت تكسر خواطر فزعوا يداوك
ومن وصلوك اجوا سلبوك عافيتك